Neend k shahr ko jatay hein tou thak jatay hein
Khawb ka bojh uthatay hein tou thak jatay hein
Kis tarah palkein utha kar teri janib daykhein ?
Ham tou palkon ko giratay hein tou thak jatay hein
Poochiye ham sey,dil o jaan hoay zakhmi jin kay
Aap tou teer chalatay hein tou thak jatay hein
Laut aaye ga musafir koi um'meed nahi
Is lye deep jalatay hein tou thak jatay hein
Un ki mahfil ki taraf kis tarah jayen k yahah
Dhoop sey saaye mein aatay hein tou thak jatay hein
Ab kisi aur ufaq par hi chamakta hai woh chaand
khud sey yeh baat chupatay hein tou thak jatay hein
Tu ney kia bojh bana kar hamein bhaija hai gulaab
Is ki khushbu ko bhi paatay hein tou thak jatay hein
Lay k jayen jo kisi ko nahi manzil ki taraf
Raastay Lout k aatay hein tou thak jatay hein
Yeh taghayur hai zamanay ka kah kaliyon ko Batool
Raaz e dil bhanwaray sunatay hein tou thak jatay hein
(fakhira batool)
("SAMANDAR POOCHTA HO GA" SEY MUNTAKHIB GHAZAL)
No comments:
Post a Comment